說故事的人——雄仔叔叔講古創作坊

雄仔叔叔講故事，無論歷盡滄桑的中年人、青春浪盪的青年人，或是天真可愛的小朋友，都被故事打動，打開自己與世界更大的連繫。講故事最終是對人和世界的理解，以及彼此的關係。雄仔叔叔現開辦一氣呵成兩週四節講古創作坊，有得聽、有份講，他想培育更多，說故事的人。

雄仔叔叔這樣說︰
「講咗好多年古，有啲心得；也教咗好多年講古，始終未盡人意。
各人帶住唔同嘅心情同目的來，有親子啦、泵人入黨啦、同基層拉近關係啦、反拆建啦……我好明白嗰啲迫切感，但總係覺得自己教嘅嘢唔埋欄，總係有啲隔。
最初同大人講古，喺皇后碼頭。當時好好笑，大家都知有個阿伯好有心，但係啲古同個運動冇乜挐褦，我自己都覺得有啲古怪，唯有安慰自己，當去捂佢哋瞓覺。
日月推移，依家好啲啦。講東北守土護地，我講我條村阿婆孭住塊田周圍種；講小販，就講當年佐敦街頭小販的七俠蕩寇；講佔領，我講耶穌來平反五餅二魚唔係神蹟，係社會主義……
都是從生活點滴開始，先不計較，講一個好聽的故事，慢慢就跟萬事萬物接軌。我條村阿婆、街頭小販、耶穌就這樣來到我嘅古仔度。
而且，不接軌又怎樣？講一個好聽嘅古仔咪好囉。
呢個諗法係啲細路教我嘅。同佢哋相處廿多年，就明白不懷好意咁同佢哋傾計，傾下傾下就有古仔。首先佢哋唔識嘢所以亂講，我又不懷好意，唔去糾正佢噃，咁，古（已有嘅、實體生活）就生仔（世界係新鮮嘅）！古仔就來啦！」
雄仔叔叔簡介︰
阮志雄，人稱雄仔叔叔。七十年代社運青年，曾當中學教師、幼兒教育工作員，劇團教育主任。於 1994 年創辦「慢慢走故事坊」，自此成為全職工匠，製作想像的真實。他亦是組織「四圍講古」的成員，毎月舉辦講古聚會，建立公眾講古平台。

日期︰2016年5月14、15、21、22日
時間︰下午6時至8時
地點︰灣仔軒尼詩道365號富德樓一樓「香港文學生活館」
學費︰$700 (香港文學館會員八折優惠)
名額：15人
# 本課不接受單節報讀

報名連結︰http://goo.gl/forms/eeg5CVyQ7u
(注︰部分節數會於戶外空間進行。)